mércores

Na Semente Compostela!

Hoxe fun ás Moas vivir unha xornada marabillosa e chea de aprendizaxes. Alí é onde está a Escola Semente Compostela que comeza así a súa presentación para quen non a coñezades: "Somos umha escola sem ánimo de lucro, de pedagogia transformadora ao serviço dos interesses populares. Queremos ser, como comunidade educativa, parte ativa dumha sociedade diversa e em movimento e trabalhar com o resto de coletivos locais e internacionais pola justiça social no mundo. O projeto educativo de Compostela oferece a possibilidade de escolarizar crianças de 2 a 12 anos (em infantil e primário) numha escola homologada polo governo galego e acreditada por NEASC (New England Association of Schools and Colleges)."

Tedes máis información sobre o proxecto neste enlace ou premendo sobre a imaxe.

Cheguei á Escola e sentinme como quen chega a casa dunhas amigas facerlles unha visita. Estiven na sala na que habitualmente a profe Sara desenvolve o obradoiro "Moito conto", alí nos recibiron a Xiana e Anya de Marionetas Trécola, á boneca Lía e mais a min que viaxamos esa mañá desde Muimenta para compartir tempo e ilusión con ela e mais coas crianzas de 5º e 6º de Primario.

Axiña nos acomodamos canda elas e compartimos un par de horiñas estupendas falando sobre "O agasallo de Anya", fixémonos multitude de preguntas e fómoslle buscando resposta a todas elas. Conteilles a miña experiencia persoal que deu lugar á novela e resultoulles moi curioso ver imaxes da profe de Infantil, Xela, como filla miña con pelo longo, lentes e dez anos menos!!!



Se xa me sentía eu súper feliz coa súa acollida, aínda o estiven máis descubrindo a escola e o quintal da man de Tiago e Vera que me explicaron cada curruncho con detalles e anécdotas... E aínda uns días despois recibín este comentario no blog que me fixo de novo sorrir agradecida por unha xornada para non esquecer nunca!

Obrigada! Sodes Sementes de Vencer!!!

Terceira visita á Illa de Arousa!

Non vos imaxinades que satisfacción tan grande me produciu voltar ao CEIP Torre Illa por terceiro ano consecutivo.

Pasei unha estupenda e solleira mañá de inverno co alumnado de 6ºA e 6ºB e as súas mestras. Acompañáronnos tamén as marionetas Anya e Xiana de Trécola, así como a boneca Lía que nos contou o seu conto.

Sempre é un pracer viaxar á Illa!!






Grazas por seguir convidándome ao voso cole!!!

luns

No IES de Ribadeo!!

O día 12 de xuño pasei unha das mellores tardes que me leva proporcionado "O agasallo de Anya".

Aproveitando que no IES de Ribadeo Dionisio Gamallo teñen clase os luns pola tarde, alá me fun despois de rematar a miña xornada na Pontenova. Comigo levei as marionetas Anya e Xiana que, desde que remataron a súa xira por teatros galegos, acompáñanme nas visitas aos colexios e institutos. 

Eu ía moi contenta con elas, pero abraiada quedei cando entrei na aula e vin que sobre os pupitres do alumnado tiñan cadansúa marioneta feitas a partir de calcetíns coa axuda da súa profesora de lingua galega, Vanesa. Alí estaban as súas particulares Anya e Xiana, pero tamén a señora Ludmila, o Brais, Sasha, a mestra Icía... a cal máis bonita e creativa. Mirade que preciosidades!


A Mariña é sempre un destino marabilloso, pero compartir parte da tarde alí con amigas, antigas compañeiras, ex alumnas e o seu alumnado de 1º de ESO e mais da Unidade de Educación Especial foi para min unha gran experiencia máis que enriquecedora e da que tirei grandes aprendizaxes.

Foi moi agradable falarmos arredor das súas lecturas e de todo o que os sorprendeu ou chamou a atención na historia das dúas protagonistas desta noveliña que tan bos momentos me dá. 





Cando rematamos a nosa conversa, sorprendéronme cuns preciosos agasallos personalizados con textos da novela. Que ilusión máis grande!

 


Rematamos a sesión facéndonos unha foto de grupo coas súas marionetas e, pola miña parte, segura de que nunca na vida esquecerei o encontro cun alumnado tan especial.


Moitas grazas!!!


mércores

Na casa, no IES da Pontenova!!

O pasado venres, día 9 de xuño, xoguei na casa!

Con motivo dun intercambio lúdico-cultural entre o alumnado de 1ºESO do instituto da Pontenova con parte dos do IES Sanxillao de Lugo, compartimos un pedazo do noso tempo na Biblioteca.

O alumnado da Pontenova leu "O agasallo de Anya" no terceiro trimestre deste curso coa súa profe de galego, María. Era estupendo, desde a ventá da aula, velos ler no xardín do instituto neses primeiros días solleiros... As rapazas e rapaces de Lugo lérono tamén con Carme que foi compañeira na Pontenova, pero nestes últimos anos desenvolve o seu traballo alí. Grazas por reparar na historia de Anya e Xiana e conmovervos con ela. Cantas e que interesantes preguntas xurdiron nese tempo compartido!

Para min foi un encontro moi especial coas alumnas e alumnos cos que levo uns meses compartindo a diario os corredores e outras dependencias do instituto e cos que, probablemente, o curso que vén comparta contas ademais de contos...

Déixovos unha mostra gráfica do que foi esa mañá na Biblioteca, son fotos realizadas por María para dar conta da actividade que levamos a cabo ese venres.








                                        




Moitas grazas por este tempo compartido!!!!!

luns

No CEIP A Ramallosa

O pasado día 19 de maio, co gallo das Letras Galegas, fun convidada polo CEIP A Ramallosa, no Concello de Teo. Alí compartín unha mañá primaveral co alumnado de 5ºA, 5ºB, 5ºC e o seu profesorado.

Estivemos no Salón de Actos xunto cunha marabillosa exposición de ecosistemas construídos por eles mesmos con todo luxo de detalles. Canto aprendo cada vez que visito un colexio!

Falamos arredor de "O agasallo de Anya", conteilles "O soño de Lía" a modo de introdución e fixéronme ducias de preguntas con moito interese na historia de Xiana e Anya, protagonistas desta noveliña que tan bos momentos me fai pasar.


 
Honráronme pedíndolles que asinase no "Libro de visitas" do colexio ademais de facelo nos seus exemplares de "O agasallo de Anya".



Antes de despedirnos, acudín con Martina, Bruno, Gael, Tania, Nana e Iván e os seus profes Fran, Óscar e Chus ao estudo de radio desde onde emiten para os "Radio Ramalloseir@s" e alí me fixeron unha fantástica entrevista. Que grandes son!!!

A verdade é que quedei impresionada e feliz despois de gozar dunha mañá fantástica. Grazas!!!

Ah! Déixovos por aquí tamén a entrevista completa para que quede constancia das grandes xornalistas que poden chegar a ser estas rapazas e rapaces de Teo. 



aaas

xoves

Anya e Xiana en Redondela!

Entre os pasados días 15 e 21 de maio, celebrouse en Redondela a vixésimo cuarta edición do Festival Internacional de Títeres que trouxo compañías de diferentes países e continentes.

Este ano o festival contou cunha homenaxe, polo seu 40º aniversario, a Marionetas Trécola que hai uns anos adaptaron "O agasallo de Anya" como espectáculo teatral e con el percorreron diferentes vilas de Galicia e mesmo Portugal.


Como parte dese recoñecemento, moitos dos escaparates de Redondela exhibiron durante este mes diferentes pezas realizadas por esta Compañía amiga. Entre elas, Anya e Xiana que tiveron a honra de adornar o escaparate da librería "La Imprenta" sendo admiradas pola multitude de persoas que encheron nesta época as diferentes rúas, prazas e outros escenarios da vila.



Que contentas e orgullosas están de pasar estes días nas Rías Baixas! 
Moito traen que contar!!!   ;)

domingo

No CEIP O Mosteirón de SADA

O venres, día 21 de abril, fun convidada a celebrar o Día do Libro no CEIP Plurilingüe O Mosteirón de Sada, na provincia da Coruña.

Foi unha viaxe ben bonita ata chegar ao cole onde fun recibida por Rocío quen me fixo lembrar momentos marabillosos de cando fun profesora e titora dela en 3ºESO no xa lonxano curso 1995-96. 

Acompañáronme Anya e Xiana de Marionetas Trécola ademais de Lía, a boneca-Piluca de tea que nos contou o seu soño de coñecer ás nenas e nenos de Ucraína para compartir os seus xoguetes...



Compartimos dúas sesións, unha co alumnado de 5º curso e outra co de 6º, nas que descubrimos moitas cousas arredor de "O agasallo de Anya", pois sempre é unha aprendizaxe mutua e para min moi gratificante. A verdade é que sempre me sorprende a interpretación que as e os lectores fan desas palabras que eu escribín.

Vían necesaria unha segunda parte na que as protagonistas se coñeceses e mesmo viñesen vivir a Sada, xa quedamos en que se matricularían na súa clase o curso que vén ;)






Foi unha xornada marabillosa e chea de emocións. Moitas grazas por convidarme ao voso cole!!!