Teatro Marionetas TRÉCOLA

Despois dun ano de conversas, ideas, feitos... penso que hoxe mesmo é o día perfecto para anunciarvos o gran traballo que desde entón están levando a cabo “Teatro Marionetas Trécola” e que está xa a piques de converterse nunha realidade.

Onte tivo lugar a primeira pre-estrea e o vindeiro mes, coincidindo co Día das Letras Galegas, estrearase no Museo Provincial de Lugo o novo espectáculo no que tantas horas leva investidas esta compañía durante o último ano. 

Trátase de “O agasallo de Anya”, unha adaptación dramatúrxica da miña novela infantil que leva o mesmo título.

Ero e Isa son os grandes artífices deste proxecto, unha maneira moi especial de contar a historia de Xiana e Anya coa axuda de distintas marionetas manipuladas con diferentes técnicas e elaboradas por eles dun xeito totalmente artesanal. Ademais deste traballo manual, desenvolveron grandes ideas para adaptar fielmente a novela a un espectáculo dramatúrxico dirixido a un público familiar.

Como “unha imaxe vale máis ca mil palabras”, deixovos unha pequena escolma de fotos do proceso de creación da obra, están feitas por eles mesmos e compartidas a través da súa páxina en facebook.

Pola miña parte, só podo amosar o meu máis sincero agradecemento e admiración cara a estes grandes artistas e mellores persoas, ademais de animarvos a todas e todos a que acudades a gozar do espectáculo que nos teñen preparado. 
Anunciaremos lugares e datas! ;)

GRAZAS!!!